E Fa'apefea ona Amata se Tamaitiiti i A'oa'oga Fa'apitoa?

E Fa'apefea ona Amata se Tamaitiiti i A'oa'oga Fa'apitoa?

E fa'afefea ona su'e e itumalō tamaiti a'oga e mana'omia auaunaga i a'oa'oga fa'apitoa?

I lalo o le tulafono o le Individuals with Disabilities Education Act (IDEA, Tulafono o A’oa’oga mo Tagata Ta’ito’atasi e iai Mana’oga Fa’apitoa) ma le tulafono o a'oa'oga fa'apitoa a le setete, e iai matafaioi lelei a itumalō e fa'ailoa ai tamaiti a'oga uma o loo nonofo i le itumalō e ono mana'omia auaunaga tau a'oa'oga fa'apitoa. O lenei matafaioi ua ta'ua o le "Child Find (Sa'iliina o se Tamaititi)." E mana'omia le iai o faiga fa'avae a itumalō ma galuega fa'atino ina ia mautinoa ai le fa'ailoina o tamaiti a'oga e iai mana'oga fa'apitoa, o nuu e nonofo ai, ma ua iloiloina.

E fa'afefea ona iloiloina la'u tama mo a'oa'oga fa'apitoa?

E mana'omia le aveina o lou alo i le a'oga fa'a-itumalō mo se iloiloga mo a'oa'oga fa'apitoa. Mo le amataina o iloiloga mo se a'oa'oga fa'apitoa, e tatau ona filifili le itumalō pe iloilo se tamaititi a'oga, ona tuuina mai lea o se fa'atagana po'o se maliēga mai matua o le tamaititi e faia ai le iloiloga. E tatau i a'oga fa'a-itumalō ona iloiloina se tamaititi a'oga i vaega uma e fesoota'i i māsaloga o le iai o ona mana'oga fa'apitoa. O le iloiloga e le tatau ona totogiina e le tamaititi a'oga po'o le aiga. E tolu sitepu faigofie mo le faia o se iloiloga:

Sitepu 1 O le talosaga mai a se tagata ina ia iloiloina le tamaititi a'oga.

Sitepu 2 E filifili le itumalō pe talafeagai le iloiloga.

Sitepu 3 O le māliega mo le iloiloga e ave aga'i i le itumalō.

E mafai ona faia sa'u talosaga mo se iloiloga o se a'oa'oga fa'apitoa mo la'u tama?

I lalo o le tulafono a Uosigitone, o tagata nei po'o fa'alapotopotoga nei e mafai ona ave iai se tamaititi a'oga mo le iloiloga:

• Soo se tagata e talafeagai ma le fa'auigaina o le upu mātua
• A'oga fa'a-itumalō
• Se isi lala sooupu mo tagata lautele
• Malamalamaaga o isi tagata i le tamaititi.

E fa'afefea ona ou faia se fa'asinoga mo se iloiloga?

1. Fai se tusi. O se fa'asinoga e tatau ona tusiina, se'i vagana e le iloa e le tagata e faia le fa'asinoga tusitusi. E mafai ona tusilimaina ma faigofie. Ia mautinoa ia iai se aso ma fai se kopi mo au fa'amaumauga.

2. Aua e te popole i le lelei o le tusi mo le fa'asinoga. Ia e popole i le faia o le tusi i se taimi vave. E leai se mea e faia se'i vagana ua faia se tusi fa'asino, ma o le aso e mauaina ai e le itumalō le fa'asinoga e fai ai le fa'asologa o le taimi e tatau ona gaioi aga'i iai.

3. Talosaga ina ia iloiloina e le a'oga le IDEA ma le Vaega 504 mo le agavaa. Afai e le agavaa le tamaititi a'oga i lalo o le IDEA, e ono mafai ona ia mauaina auaunaga i lalo o le Vaega 504.

4. Ia e manino lelei po'o a ituaiga o fa'afitauli e te iloa e aafia ai lou alo. E mana'omia le siakiina o itumalō i vaega uma e fesoota'i ma se tamaititi a'oga o masalomia e iai mana'oga fa'apitoa, ia e mautinoa e fa'amatalaina uma fa'afitauli. Mo le fa'ata'ita'iga, afai e te mafaufau o lou alo e iai fa'afitauli o le faigata ona faitau ma loto vaivai e mana'omia ai le fa'ailoaina, talosaga ina ia iloilo uma ia vaega.

5. Fa'aaoga fa'ata'ita'iga. Ia fa'aaoga lau lava vaai e fa'amatalaina ai pe aisea ua e mafaufau ai o lou alo e ono iai sona mana'oga fa'apitoa. Afai o ia te oe, tapena ni fa'amaumauga e fa'ailoa ai o lou alo e ono iai se fa'afitauli, pei o tusi mai foma'i po'o vaega su'esu'e fa'a-soifua maloloina o le mafaufau.

6. Lafo le tusi o le fa'asinoga i se tasi i le a'oga po'o le itumalō e te iloa e iai lona malosiaga ma vave ona gaioi. E ui lava e le'o fa'ama'oti mai e le tulafono se tagata patino po'o se ofisa e tatau ona lafo iai le tusi o le fa'asinoga, ae e taua le lafo i se tagata e te iloa e vave ona ia fa'agaioiina. Mo le fa'ata'ita'iga, e mafai ona e filifili e lafo le tusi o le fa'asinoga i le pulea'oga po'o le fa'atonu sili fa'apitoa o a'oga a le itumalō.

O le a le mea e tupu pe a maua e le itumalō le tusi o le fa'asinoga mo se iloiloga o a'oa'oga fa'apitoa?

E 25 aso e filifili ai le itumalō pe iloilo se tamaititi a'oga. (E leai se fa'asologa o le taimi mo iloiloga i le Vaega 504. Afai e leai se faiga fa'avae mo iloiloga 504 a le itumalō, fa'aaoga fa'asologa o taimi a le IDEA mo se ta'iala. I le faia o ana filifiliga mo le iloiloga, e tatau ona toe iloilo e le itumalō soo se fa'amaumauga o iai fa'ale-a'oa'oga ma fa'amaumauga mai le falema'i o i totonu o faila a le a'oga po'o pepa saunia e mātua po'o tagata o loo tausiaina. O le taimi lava e faia ai se fa'ai'uga a le itumalō pe e iloiloina, e tatau ona lafo e le itumalō se feau tusitusia e fa'ailoa i mātua po'o le tausi tamaititi. Afai e filifili le itumalō e le iloiloina, e mafai ona e lu'iina le latou fa'ai'uga. Taga'i i le Vaega VII o lenei lomiga mo se fa'amatalaga o auala eseese e foia ai fe'eseesea'ga ma le itumalō.

O le a le māliega e mana'omia e le itumalō e faia ai le iloiloga?

Ae le'i iloiloina e le itumalō se tamaititi mo le taimi muamua, e tatau ona fesiligia le fa'atagana mai se mātua. Afai e teena e mātua, e mafai ona talosagaina e le itumalō le fa'amasinoga ina ia soloia le mataupu ona ua mumusu mātua.

O le a le mea e tupu pe a taulimaina e le itumalō se māliega mo le faia o le iloiloga?

E 35 aso e filifili ai le itumalō pe iloilo le tamaititi a'oga. O loo fa'apea mai le tulafono a le setete o Uosigitone, o le taimi lava e maua ai e le itumalō le fa'atagana mo le agavaa ai i a'oa'oga fa'apitoa, e 35 aso a'oga e:

• Iloilo atoatoa ai le tamaititi a'oga
• Filifili pe iai se mana'oga fa'apitoa o le tamaititi a'oga
• Fuafua pe na te mana'omiaina le auaunaga o a'oa'oga fa'apitoa.

E mafai ona malilie le Itumalō ma mātua i se isi taimi fa'atulagaina, pe afai ua fa'amauina e le Itumalō le māliega a mātua. Mo le fa'ata'ita'iga, e ono manana'o mātua e fa'alautele le taimi e fa'atali ai mo fa'ai'uga o se iloiloga fa'ale-a'oa'oga tuto'atasi. E aveeseina le 35 aso a'oga fa'atulagaina pe afai e fa'aauau pea ona teena e mātua le aumaia o le tamaititi i le iloiloga po'o le fealualua'i ai o le tamaititi i lea itumalō i lea itumalō a'o faia su'esu'ega, se'i vagana o loo lelei fa'asologa o galuega a le itumalō fou e fa'amautinoa ai le fa'amae'aina vave o le iloiloga ma malilie iai mātua ma le itumalō fou i se fa'atulagana o se taimi e fa'ama'ea ai le iloiloga.

Fa'asologa o Taimi Fa'atulagaina mo Iloiloga i le Setete o Uosigitone

Fa'asinoga mo iloiloga o a'oa'oga fa'apitoa

E 25 aso e filifili ai pe iloilo tamaiti a'oga

Māliega tusitusia a mātua mo iloiloga

E 35 aso a'oga e fa'amae'a ai iloiloga

O le a le mea e tupu pe afai e fealualua'i la'u tama i le taimi o fa'asolo iloiloga?

Afai e alu se tamaititi a'oga i se itumalō ese i le tausaga lava e tasi fa'ale-a'oa'oga, e tatau ona felogona'i le a'oga muamua a le tamaititi ma le a'oga fou i se taimi vave ina ia mautinoa ai ua fa'amae'aina iloiloga o a'oa'oga fa'apitoa i le taimi fa'atulagaina. I le tulafono a le Setete o Uosigitone e mana'omia ai le amataina e le itumalō fou ona tapā fa'amaumauga o le tamaititi a'oga pe a uma ona lesitala ma sa saunia e le a'oga muamua a le tamaititi fa'amatalaga tāua i totonu o le 2 aso a'oga ma fa'amaumauga o le a'oga i se taimi vave.

O le a le 'auga o iloiloga o a'oa'oga fa'apitoa?

E tatau ona iloilo e le itumalō se tamaititi i vaega uma o loo masalomia le iai o se mana'oga fa'apitoa. E lua mafuaaga o iloiloga o a'oa'oga fa'apitoa? 1) ia fuafuaina ai le agavaa mo auaunaga, ma 2) fa'ailo mana'oga ma malosiaga o le tamaititi a'oga ina ia mafai ona fausia se polokalame a'oga fa'ata'ito'atasi. O le mea moni e tāua le tatau ai ona iloilo e le itumalō o vaega UMA e masalomia o mana'oga fa'apitoa, o se itu tāua. O nisi taimi e sili ona tele fa'afitauli o se tamaititi a'oga i lo le vaega e tasi. E ono taofia e le itumalō le iloiloga pe afai ua maua e agavaa se tamaititi i a'oa'oga fa'apitoa i le vaega e tasi. Afai e faia le iloiloga i le na'o le tasi le vaega, e ono le atoatoa fa'amaumauga o mana'oga uma o tamaiti a'oga pe a oo i le taimi e faia ai polokalame fa'a-ta'ito'atasi. Ina ia mafai ona maua le fuafuaga fa'ale-a'oa'oga talafeagai mo lou alo, ia fa'atāuaina taumafaiga a le itumalō mo

iloiloga ma ia mautinoa e malamalamagofie. Fa'amanatu i le itumalō o le latou matafaioi le iloiloina o vaega uma.

O a vaega e ono iloiloina ma o a ituaiga o su'ega o le a faia?

E ono iloiloina e le itumalō se tamaititi i vaega o loo mulimuli mai:

• Soifua maloloina (fa'aletino ma le soifua maloloina o le mafaufau)
• Vaai
• Fa'alogo
• Soifua maloloina o fa'alogona ma le va fealoa'i
• Malamalama lautele
• Lelei i le a'oga
• Fesoota'iga, tautala ma le gagana
• Gaioiga fa'atino.

O su'ega e faia mo iloiloga e tatau ona aogā ma talafeagai mo le vaega o loo su'esu'eina. O lona uiga e mana'omia ona fuaina ia sa'o i le su'ega itu o loo fa'amoemoe e fuaina. Mo le fa'ata'ita'iga, o le Wechsler Intelligence Scale for Children IV (Wechsler Fua lona IV o le Malamalama mo Tamaiti) (e ta'ua o le WISC IV) o se su'ega taatele sa fausia e fua ai le malamalama lautele. I se tulaga masani, o i'uga o le WISC IV e le tatau ona faʻaaogaina e iloilo ai le tulaga o faʻalogona o se tamaititi aua e leʻi fuafuaina mo lena faʻamoemoe. O su'ega ma mea fa'aaoga i iloiloga e tatau ona filifilia ma fa'atinoina ina ia aua ne'i iai se fa'ailoga lanu ona o ituaiga tagata, aganuu po'o itupa. E le gata i lea, o su'ega ma mea fa'aaoga e tatau ona tu'uina atu i le tamaititi i le gagana a le tamaititi po'o isi auala o feso'ota'iga (e pei o le gagana fa'ailo), se'i vagana ua le mafai ona fai. O le a le mea e mafai ona e faia? Fesili i fesili e fa'atatau i su'ega. E ui lava o fa'aupuga e fa'aaoga i iloiloga e mafai ona fa'atupu popole, ae o le faia o fesili e mafai ona e malamalama ai:

• O le mafuaaga o le su'ega, ma
• Pe o le ituaiga o su'ega sa faia e foliga talafeagai ma lou alo.

Fesili i se tasi o sui o le au su'esu'e e fa'amatala ia oe su'ega i le gagana faigofie. Ia mautinoa e mafai e le suʻega ona fua saʻo le iloa e tatau ona fuaina. Mo le fa'ata'ita'iga, o nisi su'ega e iai tausaga, tomai e faitau ma mea e mana'omia i le gagana ina ia fa'aaogaina i'uga. Afai e la'ititi tele lou alo mo se su'ega fa'apitoa, e le mafai ona faitau i le tulaga e mana'omia mo le su'ega, po'o le lē faia o le su'ega i le gagana muamua a lou alo, o lona uiga e ono fa'aleaogaina fa'ai'uga o le su'ega ma le taulia.

O ai o le a faia le su'ega?

O tagata atamamai ua aloa'ia e faia su'ega i vaega masalomia o mana'oga fa'apitoa. E mafai e le foma'i faufautua o le mafaufau a le a'oga ona faia su'ega e tele. Ae o nisi vaega e iai mana'oga fa'apitoa o le a manaomia ai se foma'i o le mafaufau e iai tomai fa'apitoa, se foma'i faufautua o le mafaufau, se foma'i o gaioiga fa'atino/tautala, se foma'i, po'o se isi tagata e iai le tomai. Afai e le mafai e le aufaigaluega a le itumalō ona faia se iloiloga atoatoa, e ono mana'omia e le itumalō le sa'ilia o tomai mai fafo e fa'amae'aina le fa'asologa o le iloiloga. O nei iloiloga mai fafo e tatau ona totogiina e le itumalō. Atonu e fesiligia e le itumalō pe iai se inisiua tuma'oti a se tamaititi po'o le aiga po'o se isi fa'atupega e totogi ai le tau o iloiloga i fafo. Afai e le mana'o se tamaititi a'oga po'o le aiga e fa'aaoga penefiti inisiua po'o isi alagatupe mo le totogiina, e tatau lava i le itumalō ona fa'atulaga ma totogi su'ega mai fafo e mana'omia e fa'amae'a ai le iloiloga.

O a nisi auala e mafai ai e le itumalō ona aoina fa'amatalaga e uiga i le agava'a o la'u tama ma mana'oga mo a'oa'oga fa'apitoa?

E tatau i le itumalō ona fa'aogaina ni meafaigāluega eseese mo su'esu'ega ma ta'iala e aoaoina ai fa'amatalaga talafeagai, atina'e ma fa'amatalaga fa'ale-a'oa'oga e uiga i se tamaititi a'oga. O le aoina o faʻamatalaga e mafai ona aofia ai le mata'ituina o le tamaititi a'oga ma faʻatalanoaga o aiga, tagata o loo tausia le tamaititi, ma isi e iloaina le tamaititi a'oga. O le IDEA ma le No Child Left Behind Act (Tulafono Ta'iala o le Leai se Tamaititi e Tuulafoa'ia) e fa'amamafaina le fa'aaogaina o su'esu'ega i totonu o vasega mo le aoaoina o fa'amatalaga. O nei iloiloga i totonu o vasega e masani ona ta'ua o fua fa'atatau fa'ale-a'oa'oga. E tatau ona e fesili pe na fa'aoga Fua Fa'atatau Fa'ale-a'oa'oga ma lou alo ina ia mafai ai e sui uma o le au su'esu'e ona toe iloilo nei su'esu'ega ona o nisi taimi e fa'amae'aina ai e le faia’oga o a'oa'oga lautele Fua Fa'atatau Fa'ale-a'oa'oga ae le fa'asoaina i le aufaigaluega o a'oa'oga fa'apitoa.

E fa'afefea pe a ou le malie i le 'auga po'o i'uga o le iloiloga?

E mafai ona e talosagaina se iloiloga fa'aa'oa'oga tuto'atasi e totogi e le itumalō pe a e le malie i le iloiloga. Afai e iai ni ou popolega i le mafuaaga po'o i'uga o le iloiloga, e iai mea e mafai ona e faia:

• Talanoa i le itumalō ma fa'aleo iai lou popolega. Talosaga i le itumalō e fai se iloiloga fa'aopoopo pe fa'alautele
• Su'e nisi auala e fai ai se iloiloga (E i ai se inisiua fa'ale-soifua maloloina a lou alo e totogi ai se iloiloga i vaega o lo'o popole ai? E tatau i se itumalō ona fa'ataua ni iloiloga mai fafo.)
• Talosaga mo se su'esu'ega fa'ale-a'oa'oga tuto'atasi e totogi e le itumalō, ma aumai se lisi o tagata su'esu'e mai le itumalō.
• Mafaufau i nisi tulaga aloa'ia e foia ai fe'eseeseaiga, e pei ole soalaupulega, se faitioga, po'o se fa'amasinoga talafeagai. Silasila i le Vaega VII o lenei lomiga mo nisi fa'amatalaga i le fo'iaina o fa'afitauli.

O le a le mea e tupu pe afai ou te talosagaina se "suʻesuʻega faʻale-aʻoaʻoga tutoatasi e totogiina i tupe faʻaalu a tagata lautele?"